Þakklæti til VG, Sjálfstæðisflokksins og hinna

Ég þakka guði, skaparanum, eða hvað skyldi kalla þann sem lagði til þennan sjálfum-gildrandi-heim. Ég þakka, ég þakka. Beygi mig og bugta. Segi amen, La-Le-húja o.s. frv.. Á sérstökum stað í hjartanu er stöðugt tárvott auga af þakklæti geymt í glerkrús. Ég opna oft þetta herbergi, bara til að kíkja og sjá hvort þakklætið sé ekki enn til staðar, að tárið sé ekki enn vott og hreint. Þakklæti þetta er fyrir fólkið sem hefur áhuga á stjórnmálum, sem nennir að sinna því vanþakkláta, heilaþynnandi starfi af einhug. Ég hef þetta bara alls ekki, og því vil ég koma formlega fram þakklæti til þeirra sem nenna að skrifa, hugsa, tala um stjórnmál almennt. Mér finnst áhugi á stjórnmálum mun áhugaverðara en stjórnmál, ég hef lengi leitað í holræsum áhugadeildarinnar í sjálfum mér en alls ekki fundið. Á meðan ég leita ekki, þá sendi ég þakkir mínar til þeirra sem nenna þessu. Amen.

Athugasemdir

[Katrín Snæhólm Baldursdóttir, 25.1.2007 kl. 21:45]

Stjórnmál eru í mínum huga hraðferð 13 frá því sem skiptir máli til þess sem skiptir engu máli. Rifrildi og að vinna rökræður. Að gleyma aðalatriðunum í fjötrum fáránleikans. Skil ekki að nokkur hugsandi manneskja skuli enn trúa á þetta leikrit. Aldrei, aldrei mun ég leyfa neinum að flokka mig í flokk. Ég er óflokksbundin andi sem svíf yfir vötnum og hlæ.

 Amen