Sannar lygar?

Ég kann því illa þegar einhver segir eitthvað fyrir eigin hag sem er klárlega lygi. Þetta er mannlegt, eðlilegt og fullkomlega o.k. í saklausu, mistakanlegu mannlegu formi. Reglulega verður okkur á í messunni og ef við gerðum það ekki þá værum við líklega á hærra lirfustigi, í einhverri engladeildinni að stjórna umferð og einhverju slíku. Við eigum að gera mistök, ljúga oft og gera okkar besta til að horfast í augu við það seinna og laga. Allt eðlilegt.

En, þegar einhverjar manneskjur út í bæ eru uppiskroppa með hugmyndir fyrir stórfyrirtækið sem það hannar auglýsingar fyrir og bullar eitthvað upp eitthvað slagorð sem er skrumskæling á sannleikanum - þá kemur það obbolítið við kauninn. Flest fyrirtæki fara þó sómasamlega með þetta. Svo ég sé uppbyggilegur í gagnrýni þá set ég líka tillögur fyrir aftan. Voilá:

1) "Öruggur staður að vera á" - Veit ekki hvort þeir eiga við Brimborg húsið sjálft en það getur að sjálfsögðu allt gerst þar eins og annarsstaðar. Svo eru bílar ekki öruggir staðir til að vera á.
Í staðinn mætti segja:
"Brimborg, við seljum bíla sem hafa verið prufaðir sæmilega með brúðum, en að sjálfsögðu ertu á eigin ábyrgð".

2) "Hagkaup, þar sem Íslendingum finnst skemmtilegast að versla" - Það eru engar vísindalegar sannanir fyrir því, finnst einhverjum skemmtilegt að versla í Hagkaup?
Í staðinn:
"Hagkaup selur fullt af vörum, hvernig þér líður á meðan þú verslar er auðvitað undir þínu dagsformi komið, skilurðu, við getum ekki borið ábyrgð á þér, en við mælum með að þú temjir þér jákvætt viðhorf til eins hversdagsfullra athafna eins og að standa í röð og versla, þetta er líka fyrirtaks leið til að horfast í augu við sjálfan sig, upplifa eigin leiðindi sem er mjög hollt fyrirbrigði - Hagkaup, þar sem þú getur ekki flúið sjálfan þig".

3) "Vöxtur, þú færð meira" - Kaupþing- það getur vel verið að ég fái meira, en þeir fá miklu meira.
Í staðinn:
"settu peninginn þinn til okkar, svo við getum ávaxtað hann fyrir okkur, og við látum þig fá örlítið af þeim hagnaði"

Læt það vera að telja upp meira. Afsakið röflið en stundum bara .... voff :)

Athugasemdir

[Vilborg Eggertsdóttir, 30.1.2007 kl. 18:30]

----- heldur svona áfram á meðan við erum föst í þeirri sjálfsblekkingu sem jarðlífshandritið er og skiljum ekki að við erum sjálf að skrifa þetta handrit eða hver annar gæti verið að búa þetta til ?

[Jón Steinar Ragnarsson, 31.1.2007 kl. 12:04]

Hmm. Gott innlegg. Kaupþing var að birta hagnaðartölur upp á 75 milljarða. Er það ekki ca. 200.000 á hvert mannsbarn hér? Augljós vöxtur en hvaðan skyldi hann fenginn og hver á hann?

Þetta er svipað og öfugmæli Bush: "You have to give up your liberty for freedom."

Annars finnst mér slagorð fjarðarkaupa mesta snilldin: Fjarðarkaup...Ekki bara verð. (nú??) 

[gerður rósa gunnarsdóttir, 31.1.2007 kl. 21:31]

Nú komst ég á ´hahahahahahaha...æjæjæjæj...´-stigið. Thanks.

[Ólaf de Fleur Jóhannesson, 1.2.2007 kl. 08:26]

:) Fjarðarkaup, jiminn.